கதை படித்தல்

அடுக்களை வேலை
அத்தனையும் முடித்து
அலுப்பென சொல்லி
அயர்ந்து படுக்கையில்
கனவுக்குள் வந்து சென்றாள்
நேற்றைய கதை நாயகி
வைத்த இடம் தேடி
கைவசம் கிடைக்கையில்
துளிர்ந்திடும் கதை நாடி
வேகமாய் ஓடி
விட்ட இடம் பிடிக்கையில்
ஆண் முகத்தில் திலகமிட்டும்
பெண் முகத்தில் மீசை வைத்தும்
பூக்களுக்கு சிறகு வரைந்தும்
தன் கதையை பூர்த்தி செய்திருந்தான்
அப்புக் குட்டி