உனக்கு மிக நன்றாக தெரிந்த விஷயத்தை, அதுபற்றி கொஞ்சமும் தெரியாத ஒருவன் சொல்லிக் கொடுப்பதை கேட்க நீ தயாராக இருந்தால் நீ வாழ்வில் வெற்றிபெறுவாய்-நிகாலஸ் செம்ஸ்ஃபோர்ட்

வியாழன், 19 நவம்பர், 2015

விளங்கக் கேட்கும் ரகசியங்களின் விடியல்



தூக்கம் தொலையும் படி செய்துவிட்ட இரவுகளின்
கூரையொழுக பெய்துகொண்டிருக்கிறது
நேற்று


கதகதப்பு வேண்டும் கனவுகள்
நனவிலி மனதின் சுவடு


திரும்பும் வழியறியாது பெய்துவிட்ட
காரணங்களின் சீலிங் பொத்தல்
நிறைய வைத்த பாத்திரத்தின் கொள்ளளவு


தெறித்து விழும் துளிகளின் இயலாமை
ரசம் பூசிச் சிரிக்கும் கண்ணாடி ரகசியங்கள்

பிரதிபலிப்பில் மாறிக்கொள்ளும் பிம்பம்
காட்சிப்படுத்தும் தோரணையின் அசெளகர்யம்
சொட்டு சொட்டாக்கித் துளிர்க்க விடுகிறது
வெளிச்சத்தை

-ரேவா

கைகுலுக்கும் சந்திப்பின் தடம்


எதிர்பாராத நேரத்தில் இணைகிறாய்
அசெளகர்யங்களின் கைகுலுக்களில்
வியர்வை வழிய ஒட்டிக் கொள்கிறது
பச்சாதாபம்

யூகிக்கமுடியாதபடி நடைபாதை பூக்கற்களில்
முளைக்கும் முட்கள் பதம் பார்க்கின்றன
காரணக் கால்களை

ஊன்றிட வலிக்கும் உண்மை
ஒதுங்கத் தேடும் இடத்தில்
பொய்யின் நிறம் வரைந்துகொள்கிறது
இன்னொரு சந்திப்பிற்கான சந்தர்ப்பத்தை

மிச்சம் வைக்கப்படும் தேனீரில்
ஆடைக்கட்டி கசந்திருக்கிறது
பழைய காத்திருப்பு

பருகக் கிடைத்த நிதானத்தில்
தீரும் உரையாடல் திருப்பித் தரும்
கையசைவில் உப்புத் தடம்

-ரேவா

நிகழ்காலக் கூண்டின் பாஷை நெல்மணிகள்


 
எதிர்பாரா சந்திப்பின் இருமுனையிலும்
கூர்தீட்டப்படுகிற நிகழ்காலம்
நிறுத்தி வைக்கிறது விசாரிப்பை

பழுத்த புன்னகையில் கழன்றுவிழும் சருகுகள்
எழுதித் தீர்க்கிற காற்றின் கையில்
இயலாத கைகுலுப்பு

நிமிடங்களில் தெளிவுறும் காட்சி
நிறுத்தும் கூண்டில் சிதறிய நெல்மணிகள்

பறந்து பழகாத பாஷைக்குள்
பக்குவப்பட்டுவிட்ட சிறகுகள்
சிறைச்சாலை

திறந்துகிடக்கும் அனுமதிப்பில்
திருத்தங்கள் விருத்தங்களாக
விழக்காத்திருக்கும் தாயத்தில்
எதிர்காலம்
-ரேவா