நிராகரிப்பின் வாசலில் நிறுத்திவிட்டாய்
வெளியேறும் கணம்
மலையளவு முன்னேற்பாட்டால்
தகர்த்தெறியும் தூரத்தின் எதுவொன்றையும்
அலட்சியப்படுத்தும் பார்வையின்
ஆணவம்
இரவு மரத்தின் வெளவாலாய்
இருள் சொற்களின் துர்வாடை
கோயில் புறாக்களின்
எச்ச வாசனை கொடுத்திடாத போதும்
அவசர தரிசனத்தின் அளவுப் பணத்தால்
சுகந்தம் கமழ்வதாய்
விரும்பிச் சொல்கிறாய்
விருப்பப் பொய்
விடுபட்டு போனதில்
இலவச தரிசனத்தின் நீண்ட வரிசை
எதன் மீதும் வருத்தங்களற்ற
எதன் மீதும் புகார்களற்ற
ப்ரியங்களைக் கூண்டிலேற்றும்
அதிகாரத்தின்
பின்
அனர்த்தப் புழுக்கள்
பிடி மண்ணைப் போட்டு
கடந்து விடுதல் சுலபமென்றாலும்
நிராகரிப்பின் வாசலிலே நின்றுகொண்டிருக்கும்
மிச்ச உயிரில்
நிறைந்து கொண்டிருக்கிறது
முன் எப்போதோ பெய்த மழை
-ரேவா
0 கருத்துகள்:
கருத்துரையிடுக