சூத்திரப் பிழைக்குள் தவறும் கணக்கின் சரிகள்

இந்த இரவு தீர்ந்துபோகும்
வெளிச்சத்தில்
ஒளித்து வைத்திருக்கிறாய் பார்வைக்கு பருகமுடியா
அடர் இருளை

நீ
கணித்துவைத்த கணக்குதானெனினும்
கால நேரத்தின் சூத்திரப் பிழை
சுழற்றி அடிக்கிறது
திசைக்கொன்றாய் இருக்கும் எல்லோரையும்

எல்லோர் திசைவழி பெய்யும் மழை
உன் வறண்ட வானிற்குள்
எதையும் கொடுத்திடாத போதும்

உன் விதை மணலில்/மனதில்
விழுந்த துளியாவோம்

தேவையெல்லாம்
உன் போல் நம்பிக்கையின் ஒற்றைப் புள்ளியில்
உருவாய் எழுந்து
கரம் கோர்க்கும் மனோபலம் தான்